Wala nasalbar sang monster double-double ni Nikola Jokic ang Denver Nuggets matapos ini nga sabayan ni San Antonio Spurs center Victor Wembanyama.
Sa nangin bakbakan sang duwa, liwat nga nagkamada si Jokic sang 41 points, 18 rebounds, kag siyam nga assists.
Apang, ginsabayan ini Wemby sang 35 points kag 18 rebounds.
Nangin hugot ang hampang sa tunga sang duwa ka bigatin nga hubon kag makapila ka beses nga nag-ilis sang lead.
Sa pagsulod sang ulihi nga quarter, uyat sang Nuggets ang tatlo nga puntos nga abanse apang ginpilit sang Spurs nga labawan ang 2023 NBA champion.
37 segundos antes matapos ang hampang, nahimo sang Spurs nga uyatan ang isa ka puntos nga lead, 111 – 110, samtang uyart sang Nuggets ang bola.
Ginpilit ni Jokic nga magpasulod sang 3-point jump shot apang napaslawan ini nga magkonekta samtang nakuha naman sang Spurs ang rebound.
Apang, na-out of bounds ang Spurs sa nanging transition play gani nagkadto sa Nuggets ang bola. Gilayon naman nga nagpatawag ang team sang timeout kag sa pagbalik sa hampang, gintuyo ni Jokic nga ipasa ang bola sa iya nga teammate apang gilayon ini nga naagaw ni Wemby.
Gilayon man nga ginpasa ni Wemby ang bola kay Davin Vessel para sa isa ka driving dunk, 2 seconds antes matapos ang hampang.
Wala na nakalagas ang Nuggets sa nabilin nga duwa ka segundos kag nagtakop ang hampang sa iskor nga 113 – 110.
