Kumpirmado nga naglab-ot na sa 11 ang death toll sa pagkarumpag sang siyam ka panalgan nga ginatukod nga building sa Angeles City, Pampanga matapos narekober sang mga otoridad ang isa pa ka bangkay sang gab-i, Mayo 31.
Suno sa Bureau of Fire Protection (BFP)–Central Luzon, narekober ang ika-11 nga biktima takna alas 10:33 kagab-i.
Ang tanan nga narekober nga bangkay ginpaidalom sa Disaster Victim Identification (DVI) protocol agud masiguro ang insakto nga pagkilala sa napatay.
Sa pihak sang madinalag-on nga retrieval operations, ginabulubanta siyam pa ka mga tawo ang missing kag ginapangita pa sang mga rescue teams sa idalom sang mga debris sang building.
Madumduman nga narumpag ang siyam ka panalgan nga building nga ginapatindog sa Teodoro Street, Barangay Balibago sang kaagahon sang Mayo 24 rason nga ginpatigayon ang massive rescue operation sa pagpanguna sang nagkalain-lain nga ahensya sang gobyerno.
