ROXAS CITY – Nagpalab-ot sang hibubun-ot ang pila ka miyembro sang Nipa Small Fishermen Association (NSFA) bangud kasubong nga wala sila ginapamatian sang gobyerno siudad kag probinsyal angut sa ila mga concerns.
Sa interview sang Bombo Radyo kay Mr. Ronilo Combate, Presidente sang NSFA, suno diri dako nga palamangkutanon sa ila kun ngaman violators lamang ang ginapamatian kag wala sila ginaimbetar kun may ginapatigayon nga pagsinapol ang provincial kag city government agud kuntani mabatian man ang ila sintyemento bilang magagmay nga mga mangingisda sa syudad.
Gintuad sini nga madugay na nila ginpalab-ot sa lokal nga gobyerno nga proteksyonan ang ila pangabuy-anan nga small fisherfolks apang ginkalain sang ila buot bangud sa wala ginadakop ang mga dagko nga sakayan kapareho sang commercial kag TRAWL operators nga nagasulod sa 10.1 km nga dapat 15 km ang kalayuon sang pagpangisda sang mga ini sa shoreline ukon baybayon.
Suno kay Combate, sila na ang legal apang sila pa ang gina-agrabyado kag ginbuyagyag sini nga ginahulat lamang sang sang dagko nga sakayan nga maglakat ang mga bantay dagat kag didto nagasugod patigayon sang pagpangisda sa sulod sang 10.1 km.
Dugang pa sini nga wala nagapahuway sa pagpangisda ang mga commercial kag trawl operators kag nagabulos-bulos lang ang mga trabahador kun sa diin ubos-ubos ang pagpanguha sang mga duna nga manggad sa kadagatan.
Kun amu malang sini suno diri, mas maayo na lang nga dulaon ang nasambit nga layi bangud ginasulod sa gihapon ang ila area sa pagpangisda.
Panawagan ni Combate sa gobyerno nga kun mahimo imbetaron sila agud mabatian nila ang mga ginadiskusyanan kag mapalab-ot nila ang ila mga concerns, suhestiyon kag iban pa nga makabulig proteksyon sa ila pangabuy-anan amu man sa kadagatan.
