ROXAS CITY – Naglab-ot sa kapin $81 bilyon ang foreign debt sang Sri Lanka sa pila ka mga pungsod nga nagresulta sa 30% inflation rate suno sa latest update sang International Media.
Sa interview sang Bombo Radyo kay Zeny Verdillo Gadut, Adviser sang Sri Lanka OFW, mas magamo na sa subong ang sitwasyon sang pungsod bangud sa nagluntad nga tensyon sa tunga sang anti-government protester kag tagasuporta sang Prime Minister matapos magpanaug ini sa pwesto sang nakaligad nga Mayo 9.
Dugang pa sini nga 9 ang nagkalamatay kag masobra 100 naman ang na-ospital bangud sa kinagamo.
Apektado ang mga Pilipino ilabi na ang ila pagtrabaho bangud nagpatuman ang kapulisan sang emergency curfew kag ginakulang pa ang mga ini sang essential supplies kag LPG nga ginagamit sa pagluto tuga sang kakulangan sang importasyon sa petrolyo.
Mahibaluan nga 330 rupees na ang kabaylo sang 1 ka dolyar kag nag-apply na ang pungsod sang loan sa International Monitary Fund (IMF) kag ginahulat nga maaprubahan ini agud amat-amat nga magbalik sa normal ang suplay sang petrolyo kag nagapanguna nga kinahanglanon.
Sa karon, padayon sa gihapon ang hublag-protesta sang mga pumuluyo agud magpanaog man sa pwesto ang presidente nga utod man sang prime minister nga ginakabig rason sang indi maayo nga pagdumala kag nagpalala sa sitwasyon sang pungsod Sri Lanka.
