Nagpakigbahin sang ila kadalag-an ang Capiz Division DanceSport Team sa ginhiwat nga Western Visayas Regional Athletic Association Meet (WVRRA) meet 2026 nga ginhiwat sa Passi City.
Sa interview sang Bombo Radyo kay John Anthony Arcete, Head Coach sang One Capiz Dancesport Team, iya ginpahayag nga tuman gid ang iya kalipay sa nakuha nga kadalag-an sang iya nga team sa nasambit nga kompetisyon.
Suno kay Arcete, apisar nga tuman ka budlay ang ila naagyan nga malab-ot ang kadalag-an daku gid ang iya pagpasalamat nga nakaya sang iya team.
Sa padayon nga pagtimakas, natigayon nga makuha nanday Mel John Ruado kag Justine Faye Besana sang Capiz National High School ang Lima ka gold kag isa ka silver sa Palarong Pambansa, Japhet Lacuarta kag Hanna Catherine Boluso sang Capiz National High School nga nakakuha sang apat ka silver kag duha ka bronze medal, kag nakakuha naman sang duha ka bronze sanday Austin Paul Daliva kag Raisa Artillero sang Capiz National High School.
Pahayag pa ni Arcete, daku ang ila pagpasalamat sa suporta sang pamilya, eskwelahan kag local nga komunidad nga naghatag sang inspirasyon kag kusog sa pag-preparar sang nasambit nga kompetisyon.
Sa subong, padayon ang ila pagpanghanda sa palaabuton nga Palarong Pambansa 2026 nga pagahiwaton sa Agusan del Sur.
