Kasado na ang opening salvo sang Capiztahan 2026 sa Disyembre 16, 2025.
Sa interview sang Bombo Radyo kay Alphonsus Tesoro, Head sang Provincial Tourism and Cultural Affairs Office, iya ginpahayag nga ang ini nga kick-off ceremony ang pagpanghanda sa palaabuton nga Capiztahan sa April 13 tubtob 19 sa masunod nga tuig.
Suno kay Tesoro, magapatigayon sang mga aktibidad kaangay sang food fest, traditional games,live band entertainment kag parada sang mga bituon kun sa diin magapasakop ang nagkalin-lain nga mga banwa sa probinsya sang Capiz nga magapakita sang ila creativity sa pagpakita sang simbolismo sang Paskwa.
Pahayag pa niya, kadungan sang Capiztahan 2026, ang pagkomemorar man sang ika-125 nga anibersaryo sang Civil Government sang probinsya sang Capiz.
Nagpanawagan man ang natungdan sa magtambong nga mangin responsable sa pagtatap sang basura agud mapabilin ang katinlo sang palibot.
