ROXAS CITY – Magabalay sang isa ka ordinansa ang mga opisyales sang Barangay Dayao, Roxas City para sa mga madakpan nga persona nga nagahaboy sang basura sa bisan diin lang.
Ini ang kasunod sang pila ka reklamo nga ila nabaton nga may nagahaboy sang basura sa pila ka lugar sa amu nga barangay, kaangay nalang sa higad sang karsada, sangha, kag circumferential road.
Sa interview sang Bombo Radyo kay Punong Barangay Winnie Batuampo, iga-discuss sa palaabuton nga assembly ang natuhoy sa ordinansa sa diin sa tion nga mapatuman na ini may nagakaigo nga multa ang madakpan.
Suno pa kay Batuampo, ginpakamaayo man nila nga magbakal sang bag-o nga garbage truck nga amu ang magakulekta sang basura.
Mahibaluan nga 14-anyos na nga nagapangalagad ang daan nga truck kag pinaagi sa bag-o nga garbage truck istable ini nga makakulekta sang basura sa ila barangay.
Ang iskedyul sang pagkulekta sang basura sa Barangay amu ang mga masunod adlaw: Miyerkules, Biyernes, kag Sabado.
Dugang pa ni Batuampo, nagapatigayon man sang clean-up drive once a month ang ila barangay agud mapahagan-hagan ang basura.
