CULASI, ROXAS CITY – Ginpasiguro sang opisyales sang Barangay Culasi, Roxas City nga padayon sila nagahimo sang alternatibo nga mga pamaagi agud matapna ang mga illegal nga aktibidad sa Barangay.
Ini matapos madakpan sa ginkasa nga drug buybust operation sa ila barangay ang gabunan nga kawatan kag nagapangbiktima sa syudad sang Roxas nga si Jonathan Dela Cruz ukon mas kilala kay alyas “Tanya”.
Sa interview sang Bombo Radyo sa Barangay Kagawad sang Barangay Culasi, Roxas City nga si Enrico Joseph, ginpahayag sini nga sang natabo ang operasyon tuyo pa kun tani sang subject person nga magpalagyo apang napaslawan ini matapos nga ma-corner sang kapulisan.
Matandaan nga nakuha sa paghinakop sini ang 4 tanan ka sachets sang ginapatihan shabu nga may kabug-aton 20 gramos kag may Standard Drug Price P136,000.00 kag P5,000.00 nga marked money.
Suno kay Joseph, bangud sa natabo mas pasangkarun pa nila ang seguridad sa ila lugar subong man ginapasiguro nga magapadayon ang ila operasyon sa adlaw kag gab-i.
Mahibaluan nga may yara sang 23 tanan ka mga Barangay Tanod ang ila barangay kung sa diin 5 kada adlaw ang naga-duty.
Mensahe sang Kagawad sa iya mga nasakupan nga indi magduha-duha nga makig-angut sa ila ilabi na kung may mga makaduluda nga hulag nga nagakatabo agud gilayon nga mahatagan sang aksyon.
