Nagpositibo ang duha ka driver sa ginpatigayon nga “OPLAN: HARABAS,2026” ukon surprise drug test sang Philippine Drug Enforcement Agency (PDEA), kaupod ang Philippine National Police, Highway Patrol Group, Land Transportation Office kag Land Transportation Franchising and Regulatory Board sa Pueblo Integrated Terminal, Roxas City.
Sa interview sang Bombo Radyo kay Mr. Jury Rocamora, Investigation Agent V kag Provincial Officer sang Philippine Drug Enforcement Agency-Capiz, iya ginpahayag nga ang surprise drug test ginapatigayon bilang kabahin sang ginhiwat nga Region-Wide “Oplan Harabas”, nga ginapatuman sang PDEA bilang preparasyon sa Semana Santa.
Suno kay Rocamora, ginlunsyar ang programa agud masiguro ang kaluwasan kag seguridad sang mga pasahero ilabi na sa nagahilapit nga peak travel season.
Nahibaluan nga 205 tanan ka mga indibidwal ang nagpaidalum sa drug test pinaagi sa pagkuha sang urine sample, kun sa diin, 203 ang nag-negatibo sa paggamit sang droga, kag duha naman ang nag-positibo.
Gin-athag ni Rocamora nga ang duha ka mga driver nga nagpositibo ang magapaidalom sa confirmatory test agud makumpirma ang resulta.
Ang operasyon gintapos paagi sa pahayag nga “Drug Test Completed,” bilang kabahin sang padayon nga pagtinguha sang PDEA kag iban pa nga ahensya sang gobyerno agud mapasiguro ang kaluwasan kag katawhay sang transportasyon sang mga pasahero sa bug-os nga rehiyon.
