ROXAS CITY – Ginsuguran sang mga katapo sang Bureau of Fire Protection ang mga aktibididad sa Oplan Kaluluwa 2021 sa bug-os nga pungsod, sa pag-obserbar sang tig-kalalag subong nga tuig.
Sa interview sang Bombo Radyo kay FO3 Joenel Cortez, Public Information Officer sang BFP-Roxas, suno diri, apisar nga may pandemya dala sang COVID-19, nagapadayon ang ila pagpahibalo sa mga pumuluyo agud mangin-aware sa mga aksidente nga tuga sang sunog.
Pila sa mga ginapatigayon nga aktibidad sang BFP amu ang pagpangtapik sang flyers sa mga etablesyimento kag pagrekorida agud mamonitor ang palibot, kun sa diin, nalibot na nila ang 47 ka mga barangay sa syudad sang Roxas.
May yara man sang na-deploy nga mga personnel sa sementeryo kag na-assign nga mga rescuers nga magaresponde sa tion sang insidente.
Naghatag man si Cortez sang pila ka mga tips agud malikawan ang sunog kadungan sa pagdumdom sang mga nagtaliwan nga minatay pinaagi sa pagsindi sang kandila.
Suno diri, likawan nga magsindi sa mga lugar nga may madali maduktan sang kalayo, kag ipahilayo ang mga lighters ukon posporo sa mga kabataan.
Likawan man nga magsindi sang kandila sa ibabaw sang mga drawers ilabi nga kun himo ini sa plastic.
