Ginkilala kag ginpasidunggan sang Senado ang P-pop girl group nga BINI bilang pagkilala sa ila kontribusyon sa musika sang Pilipinas kag nangin pinakauna nga Filipino act nga nag-perform sa international music festival nga Coachella.
Nagtambong sa Senado ang walo ka mga miyembro sang grupo nga sanday BINI Aiah, BINI Maloi, BINI Jhoanna, BINI Mikha, BINI Colet, BINI Gwen, BINI Sheena, kag BINI Stacey agud personal nga batunon ang award halin sa mga senador.
Ginduso man ni Senador Bam Aquino ang Senate Resolution 370 sa plenary session nga nagakilala sa BINI bilang inspirasyon kag bugal sang pungsod sa ila kontribusyon sa pagbangon liwat sang Original Pilipino Music (OPM) kag sa pagpalapnag sang kulturang Pilipino sa bug-os nga kalibutan.
Ginpahayag man ni Senator Joel Villanueva, wala lamang nakasulod ang BINI sa lineup sang Coachella kundi nakahimo man sang ila marka sa international stage, kon sa diin nagpangatlo sila sa Top Coachella Artists base sa Earned Media Value kag ikaduha sa online engagement sa likod ni Justin Bieber.
Nagpabutyag man sang suporta si Senator Risa Hontiveros, sa diin pamatuod suno sa iya ang grupo nga sarang makapaindis-indis ang mga Pinoy sa international stage.
