Imbestigaran sang senado ang may kaangtanan sa ginbuyagyag ni Senadora Risa Hontiveros nga naglab-ot na sa P1-billion ang gin-invest sang Government Service Insurance System (GSIS) sa isa ka online gambling platform, butang nga gintawag niya nga iresponsable kag makaduluda.
Sa iya nga diskurso sa Senado, ginpahayag ni Hontiveros nga ang nasambit nga pondo sang mga miyembro sang GSIS ang ginkapital sa DigiPlus, sa panahon nga ang balor sang shares sini yara sa pinakamataas nga P65.30 kada isa. Apang halin sadto nagnubo na sa P13.68, nga nagresulta sa daku nga kapiyerdihan.
“Those shares have since hit a low of P13.68. Lugi na,” pahayag sang senadora.
Ginkuwestyon sang senadora ang desisyon nga ini sang GSIS, ilabi na nga ang pondo ang nagikan sa kontribusyon sang mga empleyado sang gobyerno. Hugot sini nga ginpahayag nga bawal sa mga empleyedo sang gobyerno nga magsugal ukon magsulod sa mga casino, gani indi mabaton nga gamiton sang GSIS ang ila nga kwarta para sa kasubong nga sahi sang negosyo.
“In the first place, what was GSIS thinking, investing funds in online gambling? Eh, tayo nga po, mga kasamang nagtatrabaho sa gobyerno, ni hindi pwedeng tumungtong sa casino lalo na hindi pwedeng magsugal doon. Kaya bakit ang GSIS, todo taya, at ginawang puhunan ang pera ng public employees sa sugalan,” dugang pa nga pahayag sang senadora.
Suno pa kay Hontiveros, kaangay may pattern ukon padron sang mga delikado kag makaduluda nga investment decisions sa idalom sang subong nga pagdumalahan sang GSIS, nga nga ginapamunuan sadto ni Jose Arnulfo “Wick” Veloso, nga nagapabilin nga suspendido.
Ginsambit man niya nga kaangay ginalapas na ang mga patakaran kag guidleines nga ginplastar agud siguruhon ang seguridad kag integridad sang mga investment sang GSIS.
Ginalauman nga usisaon sang maayo sang Senado ang isyu nga ini agud masiguro nga maprotektahan ang interes sang mga empleyado sang gobyerno nga nagalaom sa ila nga savings sa GSIS.
