ROXAS CITY – Sa una nga kahigayunan sang programa nakabaton ang kapin 191 corn farmers beneficiaries sang fertilizer discount coupon voucher nga nagabalor sa P2,000 sa banwa sang Maayon subong nga adlaw, Setyembre 20.
Ini ang ginkumpirmar ni Mrs. Sylvia Dela Cruz, Capiz Provincial Agriculturist sang ma-interview sang Bombo Radyo.
Pahayag ni Dela Cruz, kapin 1,167 corn farmers ang maka-avail sang nasambit nga sabsidiya nga gindihon sang national government sa pagpamuno ni Presidente Ferdinand Marcos Jr. partikular sa Department of Agriculture.
Suportado man ini sang gobyerno probinsyal kag municipal local government sa Capiz.
Suno sa opisyal, may yara sang accredited dealers/merchants ang DA nga nakigbahin diri kun sa diin igapresentar sang benepisiaryo ang ila nga coupon sa ila agud magamit ang diskwento.
Dugang pa sini nga kinahanglan may certification ukon yara sa Registry System for Basic Sector in Agriculture (RSBSA) ang mga benepisiaryo agud mapamatuod nga nagatanom sila sang mais.
Ginsiling ni Dela Cruz nga masunod nga pagahatagan nga mga corn producing municipilaties ang banwa sang Tapaz, Dumalag, Dumarao, Pontevedra, Pilar kag Pres. Roxas.
Ginahulat man nila suno diri ang guidelines kag matapos ang rekisitos nga ginapangyo sang DA agud masunod nga mahatagan ang mga rice farmers.
Mahibaluan una na nga ginhatagan ang mga mangunguma sang rice farmers financial assistance nga tig-P5,000, samtang nagligad naman nga bulan ang fuel subsidy sa bahin sang corn farmers.
Ginpasalamatan ni Dela Cruz ang tanan nga mga manunguma kag fisherfolks bangud dako sini ang ila papel nga mapabilin nga food secure ang probinsya sang Capiz kag ginpasiguro sini nga nagadihon ang gobyerno probinsyal sang mga programa para sa ila.
