Gin-athag ni Philippine Coconut Authority-Capiz Head Andy Laurilla nga wala pa na-revalidate ukon na-update ang listahan sang mga benepisyaryo sang Presidential Assistance for Farmers and Fisherfolks Program (PAFF), gani may yara pa sang mga pangalan sang patay na nga indibidwal kag mga miyembro sang pareho nga pamilya.
Ini kasunod sang mga reklamo nga nabaton may kaangtanan sa listahan sang mga benepisyaryo nga ginpaskil sa mga barangay.
Sa interview sang Bombo Radyo kay Laurilla, iya ginpahayag nga ang listahan ang ginpadala mismo sang Department of Agriculture (DA) sa ila talatapan kag gilayon nila ini nga gin-distribute sa Provincial Government, mga Local Government Unit kag mga barangay sa Capiz.
Suno kay Laurilla, may masobra 58,000 ka coconut farmers sa probinsya sang Capiz, nga nagalakip indi lamang sa mga nagatanom sang lubi kundi pati sa mga farm owner, grower, tenant, leaseholder kag farm worker.
Samtang, masobra 10,000 ka benepisyaryo sa Capiz ang nalakip sa PAFF program.











