Hugot nga ginhatagan pagtamod sang Department of Justice nga ligal ang pagkaaresto kay anay Congressman Arnolfo ‘Arnie’ Teves Jr. sang gindala ini sa pungsod nagikan sa Timor-Leste.
Ini ang gin-athag ni Justice Undersecretary Raul Vasquez may kaangtanan sa topiko nga legalidad sa pagkadakop sang mga otoridad sang nasambit nga pungsod kay anay Negros Oriental representative Arnie Teves Jr.
Suno sa iya, wala man sang ginlapas ang mga ini sa layi kag gin-athag pa nga nagakadapat lang ang ginhimo sang pungsod Timor-Leste resulta sang ginpakita nga mga aksyon ni Teves sanmtang ginaaresto ini.
Kun sa diin ginpamatukan man sini nga may kapintasan ukon torture nga natabo sa pagdakop sa anay kongresista bangud suno sa iya, makit-an man sa video nga ligal ang pagpatuman sang mga otoridad sang pungsod Timor-Leste.
Subong man, gin-esplikar ni Department of Justice Undersecretary Raul Vasquez nga indi niya luyag hilabtan kun ano man ang sistema sang Timor-Leste bangud nagapati ini nga kun may yara man sang kwestyonable nga natabo sa pagkadakop, kinahanglan man ini nga mausisa mayad.
Apang, suno sa iya, kinahanglan nga ipalab-ot ini sa mga otoridad sang Timor-Leste inkasao nga nakakita ang ila nga bahin sang iregularidad sa implementasyon sang pag-aresto.
Dugang pa sang undersecretary nga ang pagpalab-ot sa mga natungdan sang Timor-Leste angut sa nasambit nga isyu agud maaksyunan sang pungsod kag malikawan na maliwat pa.
Madumduman nga si anay Congressman Arnie Teves ang gin-aresto sang mga otoridad sang Timor-Leste kag ginpabalik sa Pilipinas sang damlag lang kunsa diin yara na ini sa karon sa kustodiya sang gobyerno sang pungsod.
Nagapangatubang ini sa pagkaulamid kag ginatudlo nga ‘mastermind’ sa likod sang pagpatay kay anay Negros Oriental Governor Roel Degamo kag iban pa sadtung 2023 sa Pamplona, Negros Oriental.
