ROXAS CITY – Makabig nga isa ka welcoming development para sa ila barangay ang pagapatigayunon nga dredging operation sa Panay River.
Ini ang ginpahayag ni Punong Barangay Ernie Borreros sang Barangay Barra, Roxas City, sang ma-interview sang Bombo Radyo.
Suno deri dako ini nga bulig sa mga pumuluyo ilabi na nga madamo sa mga ini deri nagakuha sang ila pangabuy-anan.
Mahibaluan nga nangin madinalag-on ang ginpatigayon nga paghinala nanday Roxas City Mayor Ronnie Dadivas kag District Engineer Cecil Laurence Cruz kaupod ang mga katapo sang DPWH Regional Office VI sang damlag lang, agud hinalaan ang pagsugod sang pagkutkot sa nasambit nga suba.
Suno kay Borreros, isa sa mga ginalantaw nila nga rason sang pagbinaha ang pagnabaw sang suba rason nga madasig nga nagalapaw ang tubig.
Indi kaangay sadto suno deri sang madalum kag malapad pa ang suba, wala nagalapaw ang tubig kag wala sila nagakahangawa nga magbaha sa lugar kag sa kaiping nga mga kabanwahanan.
Angut sini, pagasuguran sang Department of Public Works and Highways (DPWH) ang desiltation kag pagkutkot sa bukana sang Panay River nga yara sa Barangay sang Barra, Bato kag Banica subong man sa Punta Cogon.
Samtang, magapatigayon naman sang Consultative meeting bwas nga adlaw takna ala 1:00 sang hapon sa cover gym sang Punta Barra, agud pamatian kag hinalaan ang mga suhestyon kag pamangkot sang mga pumuluyo angut sa nasambit nga operasyon.
Bangud sini, gina-agda sang amu nga Punong Barangay ang tanan nga pumuluyo nga sakop sang amu nga suba ilabi na ang mga nagakuha sang pangabuy-an nga magtambong sa nasambit nga pagapatigayunon nga pagsinapol.
