ROXAS CITY, CAPIZ- Nagapanawagan sang bulig ang pila ka mga residente sang Barangay Tanza, Roxas City sa mga nagkalatungdan bangud sa ila sini nga naekperyensayahan nga pag-baha kadungan sang nagpadayon nga pagbubo sang ulan sa syudad kag probinsya sang Capiz.
Sa interview sang Bombo Radyo kay Nanay Rosie, residente nga apektado sa amu nga barangay, ginpahayag nga nabudlayan sila sa ila sini nga pag-guha-sulod sa ila nga tagsa ka mga puluy-an bangud kun kaisa lapaw sa tuhod ang lebel sang tubig baha.
Dugang pa sini, indi lamang kay tubig baha ang ila sini nga ginakabalak-an kundi ang dala pa sini nga kadelikaduhan sa ila sini nga ikaayong lawas kaangay sang posibilidad nga pag-angkon sang balatian nga leptospirosis.
Nahibaluan, bangud sa lapok nga gintambak sa alagyan sang tubig, nagtuga ang amu nga baha sa ila nga lugar.
Sa karon, ginapangabay ni Nanay Rosie nga kuntani mahatagan na sang aksyon sang mga nagkalatungdan ang amu nga sitwasyon bangud sa gihapon, nagapabilin nga may baha sa ila nga lugar.
