ROXAS CITY – Daku ang nabulig sang pagbiya ni Capiz governor-elect Esteban Nonoy Contreras sa Liberal Party (LP) agud malutos sini si incumbent governor Antonio del Rosario sa pagka-gobernador.
Ini ang ginpahayag ni Dr. Edwin Monares, isa ka political analyst kag chairman kag chief executive sang Global Zenith Research and Consulting, Inc. (GZRCI) sa interview sang Bombo Radyo Roxas.
Suno kay Monares, wala na sini ginkakibot pa ang nangin resulta sang eleksiyon sa probinsiya bangud naguha sa ila ginpatigayon nga survey nga natak-an na ang mga Capizeño sa liderato ni Del Rosario kag political order gikan sa partido Liberal kag pamilya Roxas.
Wala man suno sa iya nakaapekto sa kandidatura ni Contreras ang pila ka mga isyu nga ginhaboy batuk sa iya bangud mas nagpangibabaw ang pagsalig sang tawo sa iya nga magaserbi sa probinsiya bilang isa ka gobernador.
Mangin ang pila ka alkalde sa probinsiya suno kay Monares ang gintalikdan naman ang (LP) bangud natak-an na sa mandu sang partido.
Mahibaluan nga nalapawan ni Contreras si Del Rosario sang masobra 17, 000 ka mga boto rason nga nakuha sini ang kadalag-an sa pagka-gobernador.
Mahibaluan nga sa 47 ka tuig nga political career ni Del Rosario, subong pa lamang ini napierdi sa iya nga kandidatura.
