Gin-anunsyo sang Foreign Minister sang Iran nga si Abbas Araghchi nga ang Strait of Hormuz, isa sa pinakaimportante nga ruta para sa global oil trade, magapabilin nga “completely open” tubtob nga may yara sang ceasefire sa Middle East.
Suno kay Araghchi, ang pag-agi sang tanan nga commercial ship sa Strait of Hormuz nagapabilin nga bukas sa nabilin nga panahon sang ceasefire.
Apang indi maathag kun bala ang ginatumod sini amo ang 10-day ceasefire agreement sa tunga sang Lebanon kag Israel ukon ang nagligad nga duha ka semana nga ceasefire sa tunga sang Iran kag Estados Unidos nga nagsugod sadtong Abril 8.
Bilang sabat, naghatag sang positibo nga reaksyon ang U.S. President Donald Trump sa anunsyo sang Iran kag gintawag ini nga indikasyon sang progreso sang peace talks.
Apang gin-athag man ni Trump nga ang U.S. naval blockade sa mga pantalan sang Iran magapabilin nga epektibo tubtob nga matapos ang isa ka kasugtanan sa tunga sang duha ka bahin.
Suno kay Trump, ang proseso mangin “100% complete” lamang sa tion nga matapos na ang mga paghambalanay.
Sa isa ka separado nga pahayag, ginsiling man ni Trump nga ang isa ka kasugtanan sa ceasefire upod sa Iran “very closed,” bisan pa nga ang nauna nga paghambalanay nga ginpangunahan ni U.S. Vice President JD Vance sa Pakistan wala naghatag sang maayo nga mga resulta.
