ROXAS CITY, CAPIZ- Nagpalab-ot sang komento ang isa ka ordinaryo nga manugbaligya sang bugas natuhoy sa ginhimo nga pagbuyagyag kag pagkontra ni Senadora Imee Marcos sa iya nga utod nga si President Ferdinand Marcos Jr. sa diin ginsiling sini nga nagagamit ini sang illegal nga droga sa ginpatigayon nga rally sang Iglesia ni Cristo.
Sa interview sang Bombo Radyo kay Mr. Edilberto Cambe, President sang Roxas City Rice Retailers Association, iya ginpahayag nga kaangay indi sang tradisyon sang isa ka Pilipino ang ginhimo sang Senadora.
Suno kay Cambe, ang mga Pilipino kilala bilang matinahuron, sa diin nga kun wala naga-hangpanay ang magpamilya, ginasolbar man ang mga problema sang magpinamilya lang kag indi kasubong sang ginhimo ni Senadora Imee.
Pahayag niya, may posibilidad nga isa ka preparasyon sang Senadora ang iya nga tikang para sa palaabuton nga 2028 elections.
Samtang, isa lang ang sigurado para kay Cambe, nga kun may nagakahinabo nga indi maayo sa mga opisyales sang pungsod, ang tuman nga nagakaapektuhan amo ang mga ordinaryo nga mga pumuluyo.
Interviewed by Bombo Sunnie Mae Constantino Batencila
