ROXAS CITY – Ginsuguran na ang paghinala angut sa pag-aprubar sang pondo sang probinsya para sa 2022.
Ini ang ginpahayag ni Board Member Jonathan “Sonny” Besa sang mainterview sang Bombo Radyo.
Suno diri, nagligad nga Biyernes ang ila gintalana nga deadline sa tanan nga departamento nga yara sa idalom sang provincial capitol agud magsumiter sang ila proposed program project activities kag proposed performance budget para malakip sa annual investment plan 2022.
Masunod naman nga igapresentar ang annual budget plan kay Governor Fredenil Castro agud maaprubahan kag masunod sini nga mahatagan kopya ang Provincial Development Council (PDC) agud ila matun-an ang mga proposed program project plan 2022 kag kun may ihatag man sila nga suhestiyon ukon komento agud mas mapaayo ini.
Kun maplastar na, igasumiter ini sa Sangguniang Panlalawigan agud maaprubahan ang AIP para sa 2022 budget.
Dugang pa ni Besa, nangin sentro sang ila paghinala ang pag-adjust sang budget para sa mga pampubliko nga ospital kun sa diin luyag man nila nga mangin intsakto ang compensation nga mahatag sa doctors kag nurses agud intsakto man ang mahatag nga serbisyo sa pumuluyo natuhoy sa ikaayong lawas.
Ginpakigbahin man sini ang 2022 expected internal revenue allotment kag local sources nga magalab- ot sa kapin 2.6B apang suno diri, sa 2023 gina-ekspektar nga magnubo ini sa 300-315 milyon, gani ginadiskusyunan man nila ang budget sa 2022-2023 para sa intsakto nga paggamit kag pagplastar sini.
Luyag ipalab- ot ni Besa sa mga pumuluyo kag medical frontliners nga ginaprayoridad nila ang sektor sang ikaayong lawas, sa pihak sang pagpaigo-igo sang budget tinguhaan man nila suno diri nga maalokaran ang iban pa nga sektor bangud ang nasambit nga budget para sa tanan.
