ROXAS CITY –Wala nangin upang ang masakit nga mga esperiensiya sa kabuhi agud mangin madinalag-on sa kabuhi ang 45-anyos nga ginang.
Nagalumaw lumaw ang mata ni alyas Nene ang 1st prize winner sang P10,000 sa Light at the End of the Tunnel-Kahapon Lamang special on success stories sang mahibaluan nga siya ang nakakuha sa una nga premyo.
Suno sa ginang kasubong nga liwat nagbalik ang masubo nga experiensiya sa kabuhi sumugod sang 14-anyos ini sa diin ginbaylo sini ang pagkababaye sa balor nga P20,000.
Gingamit ang nasambit nga kantidad sa pagpangita sa magulang nga babaye nga gindala sa Manila kag ginpagamit sang droga.
Matapos nabawi ang magulang nagpasugot ini nga ipuyo sang lalaki nga gintugyanan sang iya nga pagkababaye sa pihak nga wala naluyag.
Nagbusong ini apang bangud lamharon pa ginpa-adoptar ang lapsag sa iban nga tawo.
Apang ginkakibot na lamang sini sang gintundaan nga napatay ang lapsag bangud sa balatian.
Kadungan sini ang balita nga napatay ang lalaki nga nagasustento sa iya rason nga nagbalik ini sa iya ginikanan.
Nakilala sini ang lalaki nga una nga ginpalangga kag ginbugayan sila sang 2 ka mga anak, apang wala nagdugay ang ila pag upod bangud nagbiya ini sa ila puluy-an.
Nagpromesa man ini sa kaugalingon pananglitan liwat nga maghigugma ini na ang mangin katapusan.
Tobtob nakilala sini ang amay sang ikaapat nga anak sa diin sila nag upod.
Ginkakibot ni Nene sang natukiban nga nagagamit sang droga ang lalaki nga ginahigugma.
Apang sa baylo bayaan ang bana ginlaygayan, ginpa intiendi kag nagpangamuyo ini sa Diyos.
Tobtob ginsabat sang Diyos ang iya pangamuyo matapos ginpatuman ang Oplan Tokhang sang mga pulis kag nangin drug surrenderee ang iya mister.
Sumugod sadto nagbuligay sila nga mag-asawa agud mapatapos ang ila mga anak sa diin isa sa tatlo ka mga anak ang nakatrabaho na sa iban nga nasyon.
Isa sa mga rason sang pagpasakup sini sa promo sang Kahapon Lamang para makahatag sang leksyon kag inspirasyon sa mga pumuluyo.
