ROXAS CITY – Ginakabig nga case closed na sang Roxas City PNP ang imbestigasyon sa pagkadula kag pagkasapo sa anum ka bulan nga lapsag sa idalum sang silong sang isa ka balay sa Sitio Terel, Barangay Tanque, Roxas City.
Suno kay Police Master Sgt. Ramil Arcangeles , tagpamaba sang Roxas City PNP nga nagaguwa sa imbestigasyon nga pagkalumos ang gintunaan sang kamatayon ni Baby Xia matapos ini masapwan sa silong sang balay sang isa ka pamilya nga nagakaya kag nagabula ang baba.
Ginpahayag ni Arcangeles nga nagguwa man sa pagpangusisa nga nagatakilid na ang balay sa diin posible nagligid ang lapsag kag nagdiretso ini sa giha nga nahamtang sa kilid nga porsyon sang balay kag nahulog.
Apang posible nakalab-ot ini sa silong sang isa ka balay bangud nadala ini sa ilig sang tubig.
Bangud sa imbestigasyon ginadula na sang kapulisan ang anggulo nga may nagkuha sa bata sa ila balay.
Sa isyu naman sang mag-asawa nga ginaalegar ginapatihan yara sa likod sang pagkadula sang lapsag, suno kay Arcangeles nga wala sang mabakud nga balasehan nga makatudlo nga sila ang responsable sa natabo sa lapsag.
