PONTEVEDRA, CAPIZ- Padayon nga gina-imbestigaran sang mga kapulisan sang Pontevedra Municipal Police Station ang kabangdanan sang pagkalumos-patay sang isa ka Senior Citizen sa suba sang Barangay Ilawod, Pontevedra, Capiz.
Ang biktima amo si alyas ‘Toto’, 71-anyos, kag residente sang Barangay Jolongajog sa amo nga banwa.
Sa interview sang Bombo Radyo kay Police Captain Dennis Losbañes, Officer In Charge sang Pontevedra Municipal Police Station, iya ginpahayag nga may yara sang mga residente nga nakakita nga nalumos ang amo nga persona sa diin nga nagpanawag man ini sang bulig sa mga katapo sang Pontevedra Emergency Response Team.
Suno kay Losbañes, gindala pa sa Bailan District Hospital ang amo nga lalaki agud kuntani nga matabangan pa apang gin-deklara ini nga dead on arrival sang doktor nga nag-atendir.
Pahayag niya, sandig sa ila nga imbestigasyon, ginpahayag sang mga residente nga naga-isahanon nga nagapaligo sa suba ang amo nga Senior Citizen sang hinali nalang ini nga nalumos.
Sa subong, nagapabilin ang bangkay sang biktima sa morgue sang ospital samtang nagapati naman ang pamilya sini nga wala sang may natabo nga foul play.
Interviewed by Bombo Sunnie Mae Constantino Batencila
