PONTEVEDRA, CAPIZ – Padayon ang imbestigasyon sang mga otoridad sa gintunaan sang pagkarumpag sang covered gym sang Barangay Tacas, Pontevedra, Capiz.
Sa interview sang Bombo Radyo kay Punong Barangay Joy Ramos, iya ginpahayag nga katunga sang amo nga covered gym ang nahalitan sang pagkarumpag.
Suno kay Ramos, wala man sang napilasan bangud wala sang madamu nga tawo ang lugar bag-o natabo ang insidente.
Nahibaluan nga yara na sa lima ka tuig ang amo nga covered gym nga project sang Department of Public Works and Highways (DPWH) gikan sa national fund.
Pahayag pa niya, nagpangayo man sang bulig ang ila nga pamunuan sa local government unit sang Pontevedra kag Provincial Government agud nga ma-amat-amat sang kaayo ang amo nga covered gym.
Sa subong, ginahulat na lang nga matapos ang duha ka adlaw nga imbestigasyon agud mahibaluan kun for repair ukon for demolition ang amo nga imprastraktura.
Dugang pa niya, magapatigayon sila sang paghinun-anon nahanungod sa pagsaylo sang lugar kun diin patigayunon ang mga programa sang barangay kag temporaryo anay nga saraduhan ang amo nga gym para sa seguridad sang mga pumuluyo.
