ROXAS CITY – Nabatyagan na sang mga Overseas Filipino Workers (OFW) sa Russia ang epekto sang gyera humalin sang nag-anunsyar si President Putin sang military operation batok sa Ukraine.
Sa interview sang Bombo Radyo kay Maria Santin Reyes, tumandok sang Pampanga kag pila na katuig nga naga trabaho sa Moscow.
Suno diri nga gina-amat amat nya na hikot ang mga papeles para makapauli sa Pilipinas bangud sa gulpi nga pag nubo sang balor sang Russian Ruble kontra dolyar kag tatlo naka-adlaw nga indi makapadala sang kwarta sa iya pamilya bangud sa economic sanctions nga ginpatuman sang US kag European Union.
Dugang pa ni Reyes, limitado ang ila pag-access sa social media kasubong sang facebook kag messenger rason sang mabudlay nga kumonikasyon sa Pilipinas.
Ginakuha naman sini ang pagkabalaka sa mga himata sang mga OFWs sa Russia bangud nagapabilin nga hilway ang mga ini kag yara sa “normal” ang ila pagginawi.
Apang, aminado nga madamo sang mga militar ang makit-an sa palibot kag gina-pang tsekyar ang mga visa kag papeles kun sa diin gina-pangdeport ang mga makaduluda ang presensya kag mga expired na ang visa.
Pananglitan nga lusubon man ang Russia, nakahanda naman sila sa posible nga evacuation kun sa diin nagapromisa ang mga amo sini nga mabalhin sa probinsya malayo sa Moscow kag hilway sa katalagman.
Mahibaluan nga madamo na sang mga OFW’s ang nagdesider nga magpauli sa Pilipinas bangud sa posible nga dangatan kun magapadayun pagid ang gyera.
