ROXAS CITY – Ginsuhestyon ni anay Traffic Management Unit (TMU) head kag sa karon administrador sang Roxas City Integrated Transport Terminal (RCITT) Victor Arcenas nga ipaidalum sa seminar quarterly ukon duha ka beses sa isa ka tuig ang mga traffic enforcer agud maintindihan ang ginapatuman nga ordinansa kadungan sang pagpakamalaut sa social media sang laragway sang citation ticket nga nakasaad ang sala nga spelling sang helmet.
Suno kay Arcenas, kadam-an sa mga traffic enforcer ang high school graduate sa madugay na nga panahon gani pinaagi sa seminar, ma-refresh ang paino-ino nila sa tama nga spelling kag tama nga implementasyon sang layi.
Magaserbe man ini bilang preparasyon sa mga enforcers, pananglitan may turista ukon dumuluong nga magpadulong sa syudad ang madakpan indi ini mahuy-an bangud bastante sini ang ihibalo pag-abot sa ginpatuman nga ordinansa.
Aminado man si Arcenas nga may gamay nga sala ang enforcer apang indi na ini kinahanglan pa nga ipadaku kag pataw-an sa social media.
Kuntani sa baylo nga pagpakamalaut, appreciation ang ihatag sang publiko sa mga enforcers nga nagabulad sa initan agud serbisyuhan ang pumuluyo kag ipatuman ang ordinansa.
Matandaan, nag-angkon sang nagkalain-lain nga reaksyon ang nasambit nga laragway kun sa diin sa baylo nga helmet, ‘hilmate’ ang nasulat sang enforcer matapos nadakpan sini ang isa ka motorista nga naglapas sa ‘No Helmet, No Driving Ordinance of Roxas City’.
