ROXAS CITY – Ginpatpat sang provincial agriculturist ang pila sa mga rason sa pagtaas sa presyo sang bugas indi lamang sa probinsya sang Capiz, amu man sa bug-os nga pungsod.
Sa interview sang Bombo Radyo kay Mrs. Sylvia dela Cruz, Provincial Agriculturist, suno diri daku nga factor sa pagtaas sa presyo sang bugas ang pagmahal sa presyo sang gatong kag abono, pagpamahog nga dala sang El Niño kag indi mapaktan nga panahon kasubong sang kalamidad.
Magluwas pa diri, rason man ang manubo nga suplay apang mataas ang demand sang produkto bangud magasugod pa sa katapusan sang Agosto ukon una nga semana sang Setyembre ang tig-alani.
Aminado si dela Cruz nga nagtaas ang presyo sang bugas matapos ang monitoring sang ila talapatan sa merkado yara na sa P48 tubtob P50 ang kada kilo sang imported rice samtang P45 tubtob P48 naman ang local rice.
Suno diri, isa ini ka global crisis, nagakahulugan indi lamang Pilipinas ang naka-eksperensya sang pagmahal sang bugas, amu man ang iban nga pungsod, kasubong sang India nga gin-ban na ang pag-export sang bugas bangud sa kakulangan sang suplay.
Samtang, ginklaro man ni dela Cruz ang rason sang Department of Agriculture (DA) sa pag-import sang bugas, ini ang bangud sa RA 11203 ukon Rice Tariffication Law ukon pagbalhin sa tariff system nagikan sa sistema sang quantitave restriction sa rice importation.
Pinaagi sa RA 11203, ang taripa nga makolekta sa pag-import sang bugas ang magakadto sa Rice Competitiveness Enhancement Fund (RCEF) samtang ang masobra nga koleksyon sa P10-B fund ang magakadto sa Rice Farmer Financial Assistance (RFFA).
