ROXAS CITY, CAPIZ- Yara sa 50/50 nga sitwasyon napahamtang ang may kaangtanan sa pagpanagtag sang condom sa mga buluthuan kag mga opisina sa pungsod Pilipinas.
Sa interview sang Bombo Radyo kay Dr. Cesar Yap Jr., Resident Doctor sang Bombo Radyo Roxas, ginpahayag nga may pila ka mga ginikanan kag mga manunudlo ang nagsiling nga pabor sila sa amo nga lihok, kag may pila man ang nagsiling nga indi sila pabor.
Dugang pa ni Dr. Yap nga sa mga ginikanan kag manunudlo nga nagpahayag nga indi sila pabor sa amo nga lihok, bangud nga ang rason sini, may posibilidad nga ma-trigger ukon mas magduso sa mga kabataan nga himuon ang sexual activity.
Apang, sun okay Dr. Yap, mas maayo kun unahon ang edukasyon kag pagpaintindi sa mga kabataan may kaangtanan sa sini nga butang antes sila nga hatagan sang amo nga condom.
Nahibaluan nga ang nasambit nga lihok ang inisyatibo sang Department of Health bangud sa nagadamo nga kaso sang Human Immunodeficiency Virus (HIV) sa pungsod sa diin nga kalabanan nga nagpositibo sa amo nga balatian ang mga pamatan-on.
Samtang, nagpahanumdom naman si Dr. Yap nga ang edukasyon may kaangtanan sa sexual activity, nagaumpisa sa mga ginikan, rason nga dapat sa balay magaumpisa ang pagtudlo agud malikawan ang amo nga balatian kag kun mahimo, indi mag-isa-duha sa pagpakonsulta kun may ginabatyag na nga sakit nga posible senyales sang HIV.
