ROXAS CITY – Aminado ang PENRO-DENR nga madamo sang mga reklamo nga ginpalab-ot sa ila talatapan natuhoy sa mga campaign posters nga ginpangtapik sa mga kakahuyan.
Ini ang ginpahayag ni Mr. Joel Navarra, OIC sang Provincial Environment and Natural Resources Office (PENRO) sang Department of Environment and Natural Resources (DENR) sang ma-interview sang Bombo Radyo Roxas.
Suno kay Navarra, nga may memorandum na sila nga ginpapanaog sa Community Environment and Natural resources Offices (CENRO) kag MENRO sa tanan nga mga kabanwahan agud mahimuan sang aksyon ang mga reklamo.
Ginpahayag man ni Navarra nga nagaupod sila sa COMELEC kun magpatigayon ini sang oplan baklas sa mga campaign materials nga ginatapik sa mga kakahuyan kag sa indi insakto nga lugar.
Nagapanawagan man ini sa mga kandidato kag sa tanan nga mga supporters nga likawan ang pagtapik sang mga campaign posters sa mga puno sang kahoy bangud dako ang bulig kag papel sini sa atun palibot.
