Plano para sa pagpanubo sang inflation kag mataas nga presyo sang pagkaon ang luyag nga mabatian ni Senator Migz Zubiri sa ika-tatlo nga State of the Nation Address (SONA) ni Pangulong Bongbong Marcos sa Lunes, Hulyo 22, 2024.
Suno kay Zubiri, nagalaum siya nga magaplastar sang plano si PBBM agud mapanubo ang inflation kag presyo sang mga pagkaon partikular sang bugas agud masiguro nga mabatyagan sang mga Pilipino ang ginasiling nga pag-umwad sang ekonomiya.
Dugang pa nga luyag sang Senador, nga matalakay sang Presidente ang pagtaas sa adlawan nga sweldo ilabi na ang mga minimum wage earners nga mas nabatyagan ang kabudlay bangud sa pagtaas sang inflation.
Kadungan sini, panawagan ni Zubiri kay Marcos nga ipasa na ang pagpataas sa minimum wage law agud mas makabulig sa mga Pilipino.
Katapusan amu ang isyu sang POGO kun sa diin, nagakinahanglan na sang sigurado nga aksyon nagikan sa gobyerno kaangay sa pag-angkon sang klaro nga polisiya kun gilayon nga i-ban ukon ipaidalum sa transition phase sa iban nga industriya ang mga apektado nga empleyado.
