ROXAS CITY – Ginakabig nga tyranny of numbers ukon tyranny of the majority ni Capiz 1st District Congressman Emmanuel Billones Sr., ang pagpasa sa second reading sang death penalty bill sa House of Representatives.
Dismayado man si Cong. Billones bangud wala ginsunod ang proseso sang pagboto para sa isa sa mga importante nga hagna, matapos nga gilayon gintapos ang period of debate and amendment kag nagpatigayon sang pagboto.
Wala man naka-apela ang mga kongresista nga nagapamatuk nga liwat mabalik ang silut nga kamatayon bangud gilayon nga nag-adjourn ang sesyon.
Gin-ako man ni Billones nga kasubong nadulaan na sila sang paglaum sa minorya nga maupangan ang nasambit nga hagna bangud sa mabaskog nga convincing power sang administrasyon sa pila ka mga kongresista.
Samtang gin-athag sini nga wala ginpwersa ang mga LP congressmen sa ila nga panindugan sa death penalty bill, bangud ila ginboto ang dikta sang ila nga konsensya.
