Nangin madinalag-on pagpatigayon sang Department of Education (DepEd) Regional Office VI sang Brigada Eskwela 2026 kag Learner Rights and Protection (LRP) on Wheels Regional Orientation, kag We Are Child Advocates for Resilience and Empathy (We CARE) Program sa Maayon National High School.
Sa interview sang Bombo Radyo kay Police Major Rachelle Garnica, Public Information Officer sang Capiz Police Provincial Office, iya ginpahayag nga ang We CARE ang isa ka programa nga naga-engganyo sa tanan nga sektor sang komunidad nga magbuligay sa pag-giya sa mga kabataan agud mangin responsable sa pagtuon.
Gin-athag man sini nga may daku nga responsibilidad ang kada isa sa aton sa pagbulig para sa kaayuhan sang mga kabataan.
Samtang ang Learner Rights and Protection (LRP) on Wheels Regional Orientation naman ang nagatutok sa pagtukod sang maayo, matinlo kag komportable nga palibot para sa pagtuon para sang mga estudyante.
Tinutuyo sang programa amo ang mapasangkad ang mga kabataan kag madugangan pa ang ihibalo sang komunidad parte sa ila mga kinamatarong kag kaayuhan sa sulod sang eskwelahan.
