UAE – Pormal na nga ginpirmahan sang Pilipinas kag United Arab Emirates ang Comprehensive Economic Partnership Agreement ukon CEPA sa Abu Dhabi, nga ginakabig nga isa ka makasaysayan nga tikang bangud ini ang labing una nga free trade agreement sang Pilipinas sa isa ka pungsod sa Middle East.
Nasaksihan ang pirmahanay nanday United Arab Emirates President Sheikh Mohamed bin Zayed Al Nahyan kag Presidente Ferdinand Marcos Jr., nga yara subong sa UAE para sa iya una nga overseas visit subong nga 2026.
Suno kay Bombo JM Palmares Avelino, International Correspondent direkta sa United Arab Emirates, importante ang agreement nga ini indi lang sa gobyerno kundi amo man para sa mga Filipino nga nagatrabaho kag nagatinir sa UAE.
Pahayag niya, dako nga oportunidad ini para sa mga Filipino products nga mas mapadasig ang pagsulod sa Middle Eastern market, nga mahimo magbukas sang mas madamo nga trabaho kag Negosyo para sa mga Filipino, ilabi na sa sector sang agrikultura, electronics kag magagmay nga Negosyo.
Dugang pa sang natungdan, positibo ang pagbaton sang Filipino community sa pagbisita ni President Marcos bangud ginapakita sini ang pagpabaskog sang relasyon sang duha ka mga pungsod sa bahin sang ekonomiya.
