ROXAS CITY – Ginpasuspinde ang mga quarry operations sa nagkalain-lain nga banwa sa probinsya sa idalom sang executive order nga gin-isyu sang Hulyo 11, 2022 kag ginpaguwa ni Governor Fredenil “Oto” Castro.
Ini ang ginsiling ni Atty. Ma. Leobeth Delicana, Provincial Legal Officer sang mainterview sang Bombo Radyo.
Suno diri, nakasulat sa executive order sang gobernador nga ang mayor nga rason nga ginpasuspende ang mga operasyon bangud sa madamo siya nabaton nga reklamo nga may mga ginbayolar ang mga permit holders kag may yara mga operasyon nga wala sang permit.
Bangud diri, naghimo man sang task force agud maglibot sa kabanwahanan, maginspeksyon, kag mag-isyu sang kopya sang executive order sa mga naga-quarry.
Nagkaladakpan man ang pila sa mga nagapatigayon sang operasyon ilabi na ang mga wala sang permit kag gin-isyuhan sang cease and desist order.
Sa karon, suspendido tanan nga quarry operation, apang ginakonsiderar sa gihapon sang gobernador ang kinahanglanon sa bato kag balas, gani pagatugutan sini ang kutob lamang sa permit holders nga magkuha sang special permit kun sa diin tsekyaron ang lugar kag mga papeles antes liwat makapadayon sa operasyon.
Panugyan ni Delicana sa mga naga-quarry, magsunod sa layi, ordinansa angut sa quarry, pati man sa nasyunal nga layi kag sang kaangut nga ahensiya para mapasanyog ang legal nga operasyon sa quarry.
