Ginakabalak-an sang kampo ni anay Speaker kag Leyte Representative Ferdinand Martin Romualdez ang pagtawag sa iya bilang “mastermind” samtang nagapadayon pa ang preliminary investigation.
Suno sa iya abogado kag spokesperson nga si Atty. Ade Fajardo, mahimo ini maghatag sang impression nga may nahimo na nga conclusion antes pa matapos sang Office of the Ombudsman ang pag-usisa sa mga ebidensiya kag depensa ni Romualdez.
Una na nga ginpangabay sang mga abogado ni Romualdez si Ombudsman Jesus Crispin Remulla nga mag-inhibit sa kaso paagi sa isa ka sulat sang Abril 22.
Ginsambit sang depensa ang mga pampubliko nga pahayag ni Remulla parte sa imbestigasyon nga suno sa ila mahimo maghatag sang impression nga may nauna na nga desisyon batuk kay Romualdez.
Suno kay Fajardo, nabalaka sila nga bangud sa madamo nga pampubliko nga pahayag sang subong nga Ombudsman, daw may nauna na nga desisyon ukon konklusyon kag ginapangita na lamang ang mga ebidensiya nga magasuporta sini.
Ginpabutyag ni Fajardo nga samtang nagapadayon ang preliminary investigation, kinahanglan ang patas kag wala sang ginaapinan nga proseso, ilabi na kay may mga testimonya pa nga nagabag-o kag may dugang nga mga ebidensiya nga wala pa mahatag sa depensa.
Gintawag ni Fajardo ini nga “prejudicial” ukon makahalit sa patas nga proseso, kag mahimo man ini makadugang sa pagpalapta sang isa ka partikular nga panan-aw.
Ang preliminary investigation amu ang proseso nga ginahimo agud matukiban kun may yara sang nagakaigo nga ebidensiya para mapasaka ang kaso sa korte.
Ginpangabay sang kampo ni Romualdez nga ang mga reklamo resolbahon base sa mga ebidensiya nga husto nga ginapresentar kag ginaupod sa proseso, kag indi base sa mga ginapalapta samtang yara pa sa imbestigasyon ang kaso.
