Nagpaandam si International Criminal Court Assistant to Counsel Atty.Kristina Conti nga ang pahayag ni Senate President Alan Peter Cayetano nga nagadepensa sa war on drugs sang nagligad nga administrasyon ang mahimo makaapekto sa posibilidad nga mahilway si former President Rodrigo Duterte.
Suno kay Conti, nagapakita sa pahayag ni Cayetano nga nagapabilin nga mabakod ang impluwensya kag koneksyon ni Duterte sa Pilipinas, bagay nga posible ginakabalak-an sang International Criminal Court (ICC).
Suno kay Conti, posible nga maghunahuna ang ICC nga may mga tawo nga willing nga magbulig kay Duterte sa tion nga magbalik ini sa pungsod, gani mahimo nga rason ini agud indi pagtugutan nga makahilway ang anay presidente samtang nagapadayon ang imbestigasyon.
Matandaan nga ginpahayag ni Cayetano sa Facebook livestream nga ang war on drugs ni Duterte isa ka “pro-life” kag “human rights” nga kampanya nga nagatuyo sa pag-amlig sa mga komunidad batok sa ilegal nga droga.
Nahibaluan nga si Cayetano kag Duterte ang madugay na nga kaalyado sa pulitika kon sa diin si SP Cayetano ang running mate sang anay presidente sang 2016 elections kag nagserbe man bilang foreign affairs secretary kag House speaker sa idalum sang anay administrasyon.
Samtang, wala pa sang pahayag si Cayetano angut sa komento ni Conti.
