Gin-aunsyo ni Ukrainian President Volodymyr Zelensky nga nangin mabinungahon ang paghambalanay upod sa US Special Envoys nga sanday Steve Witkoff kag Jared Kushner.
Suno kay Zelensky, nagtukod sang bag-o nga peace plan sa pagpasanyog sang paghidait sa nagapadayon nga inaway sa tunga sang Russia kag Ukraine.
Nahibaluan nga ang mga opisyal sang Amerika kag Ukraine nag-ugyon sa isa ka bag-o nga “20-point peace plan” nga nagalakip sang posible nga pag-atras sang mga tropa sang Russia sa sidlangan nga bahin sang Ukraine, ang pagtukod sang isa ka demilitarized zone, kag mga garantiya sa seguridad gikan sa US, North Atlantic Treaty Organization (NATO), kag mga pungsod sa Europa.
Una na nga nagpaninundugan si Ukrainian President Volodymyr Zelensky nga indi sila magsungka sang anuman nga teritoryo sa Russia.
Sa subong, kontrolado na sang Russia ang 85% sang Donbas Region.
Samtang, ginarepaso pa sang Russia ang bag-o nga proposal samtang nagapadayon ang tensyon sa tunga sang duha ka pungsod, nga pareho nga nagareport sang pagpamomba kag pag-atake sa Donetsk.
