Ginatudlo nga isa sa mga rason sang Department of Agriculture (DA) sa paglala pa sang halit sa sektor sang agrikultura sa pungsod tagsa may naga-igo nga kalamidad ang palpak ukon indi epektibo nga pila ka mga flood control projects.
Suno kay Agriculture spokesperson ASec. Arnel de Mesa, kun epektibo lang ang flood control projects, kuntani gamay lang ang damage sa sektor ng agrikultura.
Ginreport sang opisyal nga naglab-ot sa 500,000 tubtob 600,000 metriko tonelada ang nagakarekord nga danyos sa agrikultura kada tuig bangud sa tuman nga pagbinaha, nga kadam-an nga nagakahalitan amo ang mga humay.
Paathag ni Asec. de Mesa nga kun madali lang kuntani maghubas ang mga baha, madasig lang man kuntani ang pag-rekober sang humay bangud ginapatubigan naman ini apang indi sini kayanon kun madugay nga nakababad sa tubig-baha.
Magluwas pa sa palay kag crops, ginsiling man sang DA official nga mahimo nga magresulta ang mga pagbaha sa pagkapatay sang livestocks kag halit sa mga pasilidad para sa irigasyon kag agricultural infrastructure.
Madumduman, nga sang Hulyo, ginreport sang DA nga naglab-ot sa P3.53 billion ang gintingob nga balor sang halit sang pagpanglaslas sang asud-asod nga bagyo Crising, Dante kag Emong kag hangin Habagat.
Kaangot sini, imbes nga pondohan ang flood control projects nga napamatud-an nga indi epektibo, maayo kuntani suno sa iya nga gamiton na lang ang mga pondo para sa irrigation facilities nga magabenepisyo sa mga mangunguma kag sa output sang agrikultura sa pungsod.
Suno sa iya, pamaagi sang dugang nga pondo para sa irrigation projects, makabulig ini para makapatindog ang DA kag National Irrigation Administration sang mas madamo nga drainage kag water impounding projects kaangay sang mga dam, nga magatipon sang mga tubig-baha kag pagagamiton para sa irigasyon.
