SAPIAN, CAPIZ – Halos indi makapati ang pamilya Almanon nga ginbawian na sang kabuhi ang ila himata nga si Rex Almanon matapos nga ginaalegar nakuryente sa Barangay Damayan, Sapian, Capiz.
Suno kay Alona Almanon, iloy sang biktima nga madamo pa kuntani sang handum ang iya nga bata nga si Rex, 22 anyos, matapos nga nakuryente patay sa nasambit nga lugar.
Ginpahayag ni Alona nga nagahulat na lamang si Rex sang resulta sang iya ginkuha nga eksaminasyon sa Philippine Coastguard rason nga temporaryo ini nagtrabaho bilang panday.
Bangud diri wala nagalaum si Alona nga mapatay ang iya nga bata kun sa diin tuyo man lang kuntani sini nga buligan ang iya abyan nga si Jonel Flores, 38 anyos sang Barangay Man-up, Altavas, Aklan nga una nakuryente matapos nasagaid sa nagalaboy nga duplex wire nga naggikan sa balay ni Marites Florentino nga naka-angut sa ila nga water pump.
Samtang suno kay Marites Florentino nga wala ini nakahibalo kun nagaandar ukon nakapatay ang ila nga kuryente pakadto sa ila nga water pump nga ginatudlo gintuna-an sang pagkamatay sang duha ka mga biktima.
Nahibaluan nga nabatian pa ni Florentino nga nagasinggit sang tabang ang mga biktima apang sang pagpalapit na sini naabtan niya na lamang nga ginakuryente na ang duha.
Bangud diri, gilayon nga gin-utod sang mga residente ang kuryente kag gintabangan ang duha ka mga biktima nga madasig naman gindala sa Mambusao District Hospital apang gindeklarar man ang mga ini nga dead on arrival sang attending physician.
Samtang, nakita naman sa ginpaidalom nga autopsy examination sa mga bangkay sang duha ka biktima nga may sunog sa liog si Almanon apang may pilas naman sa lawas si Flores.
