ROXAS CITY — Tuman nga kalisod ang nabatyagan subong sang pamilya sang napatay nga magpaka-isa mga ginaalegar katapo sang New People’s Army nga naka engkwentro sang tropa sang 61st Infantry Battalion sang Philippine Army sa Sitio Maknoy, Barangay Jebaca sa banwa sang Maayon.
Ginpanindugan ni Gng. Lucivita Borres, iloy sang isa sa mga napatay nga si Lorendo Borres, 48-anyos sang amo man nga lugar nga indi sang katapo sang rebelde nga grupo ang iya anak.
Ginsaysay niya nga naglakat lamang sa bukid ang iya anak agud magpahalab sang ila kasapatan kag wala ini sang bitbit nga armas luthang magluwas gid lamang sa dala sini nga binangon.
Nabatian pa sang ginang ang asud-asod nga nilupok sang armas sa bukid sang hapon nga natabo ang insidente kag tuman na lamang ang iya pagkahangusbo sang nahibaluan nga napatay ang iya anak sang mga militar.
Suno sa ginang, isa ka maayo nga tawo ang iya nga anak nga pamilyado naman.
Ginkadismaya niya nga wala man lang nagpangusisa ang mga katapo sang militar antes nila gintiro ang iya anak, bangud suno sa iya, isa lamang ini ka mangunguma kag indi sang katapo sang rebelde nga grupo.
Sa pihak nga bahin, dako ang pagkabalaka sang ginang nga si Marjorie Dequino sa mangin palaabuton nila sang iya apat ka mga kabataan matapos nga napatay man sang mga katapo sang militar ang ila padre de pamilya nga si Ian Borres, 24-anyos ang edad sang amo man nga lugar.
Magkaupod nga nagapuyo si Dequino kag Borres kun sa diin may yara sila sang apat ka mga kabataan nga nagapang-edaron sang lima ka tuig ang subang kag pito pa lamang ka bulan ang hinipo.
Ginapanindugan man ni Dequino nga indi sang katapo sang NPA ang iya kaupod kag naglakat lamang sa bukid agud magpanapas sang tubo kag makapangita sang inugbakal sang gatas sang ila lapsag.
Suno kay Dequino, wala nagadala sang armas si Borres kag wala man ini sang kaangtanan sa armado nga hublag.
Nagahandum man siya nga mahatagan sang hustisya ang kamatayon sang iya kaupod.
Mahibaluan nga una na nga ginpanindugan sang pamunuan sang 3rd Infantry (Spearhead) Division sang Philippine Army nga mga katapo sang rebelde nga grupo ang mga napatay sa nagluntad nga engkwentro.
Suno sa tagpamaba sang 3rd ID nga si LTC Ericson Rosana, bag-ong recruit nga mga NPA ang duha kag propaganda lamang sang mga rebelde nga ipahayag nga ini ang mga sibilyan agud ipaguwa sa publiko nga kasubong ginlapas sang militar ang ila tawhanon nga mga kinamatarong.
