Nagpalab-ot sang suporta ang Director sang Jaro Archdiocesan Social Action Center (JASAC) sa Iloilo may kaangtanan sa panawagan ni Kalookan Bishop Pablo Virgilio Cardinal David sa gobyerno nga aksyonan ang pagdako sang online gambling sa Pilipinas, nga madali na lang ma-access sang tanan, bisan sang mga kabataan.
Sa interview sang Bombo Radyo kay Messenger Militon Oso, Director sang Jaro Archdiocesan Social Action Center (JASAC) iya ginpahayag nga indi man suno sang malain ang paghuygo bangud nga nagatuga man ini sang recreational para sa mga indibidwal. Ang malain lang diri suno sa iya, ang pusta nga tagdalagkuan.
Dugang pa sini, nga kuntani tapnaon sang nagakalatungdan ang mga pasugal nga nagapangayo sang dalagkuan nga mga pusta bangud nga suno sa iya amo ang malain sa bahin sang sugal.
Nahibaluan nga sa facebook post ni Cardinal David, ginpahayag niya ang kritisismo sa mga ahensya sang gobyerno nga nagapakita lang sang kabalaka sa ilegal nga offshore gambling, samtang ginatugutan naman ang lokal nga online gambling nga mag-operate nga wala sing problema kag ginmensyonar man diri ang pila ka mga bantog nga tawo nga nagapang-engganyo sang sugal nga kunatni hatagan man ini sang igtalupangod kag nagakaigo nga aksyon.
Samtang, ginapangabay ni Messenger Oso sa mga katawhan nga mas pilion gid ang kaayuhan kaysa sa kalainan kay suno sa iya, kun sa Diyos ang sentro sang kabuhi, magaayo gid kag magamag-an ang dalagan sini.
Interviewed by Bombo Francis Biñas
