Ginpasiguro sang Department of Trade and Industry (DTI) ang pagbulig sa rehabilitasyon sang mga negosyo, ilabi na ang MSMEs, nga naigo ni Severe Tropical Storm Kristine.
Sa Palace press briefing ginpahayag ni DTI Acting Secretary Ma. Cristina Roque nga nagpain ang ahensiya sang P2 billion para sa rehabilitasyon sang nasambit nga mga negosyo.
Suno kay Roque nga ang maximum amount nga mahimo nga hulamon sa idalom sang loan program amu ang P300,000 kada tawo. Ginpahayag pa sini nga ginpasimple sang DTI ang requirements para sa mga indibidwal nga luyag maghulam.
Suno sa DTI, ang loan application ang mahimo nga i-extend tubtob January 31, 2025.
Dugang pa sang ahensiya, yara sa 102 MSMEs ang naapektuhan ni ‘Kristine’
Una na nga ginsiling sang DTI nga nagapakig-angut na ini sa nagkalain-lain nga ahensiya kag private sector partners agud masiguro nga ang mga apektado nga negosyo ang makabaton sang mga kinahanglanon nga resources kasubong sang financial aid kag advisory services.
Ang mga apektado nga negosyo ang ginaganyat nga makig-angut sa ila nga pinakamalapit nga Negosyo Centers ukon DTI regional offices para sa bulig.
Sadtong nakaligad nga Agosto, nagpatuman ang DTI sang loan program para sa Typhoon Carina-hit MSMEs pinaagi sa financing arm sini nga amu ang Small Business Corp.
