ROXAS CITY – Wala nagalaum si Punong Barangay Romeo Doloso sang Barangay Liong, Roxas City nga wala ginabayad ni Armiel Duron Barangay Treasurer sang ila barangay ang P3,845.00 nga bulanan nga ginabayaran sang pila ka mga barangay officials nga ginloan sa bangko.
Sa interview sang Bombo Rdayo kay PB Doloso, ginpahayag sini nga kumpiyansa siya kay Duron rason nga sa tion ginapangayuan niya ini sang resibo kag ginasiling nga yara lang ini sa ila puluy-an wala na niya ini ginatsekyar pa.
Apang, tuman na lamang ang iya kakibot sang nahibaluan kag nagpalab-ot sang reklamo ang pila niya ka mga barangay kagawad partikular ang mga nagloan sa bangko matapos nga nakabaton sila sang demand letter nagikan sa bangko bangud sa kapaslawan nga pagbayad sa sulod sang pila ka bulan.
Bangud sini, gilayon nga gin-istorya ni Doloso si Duron kag ginpanugyanan nga indi siya mabasol sa mga mabatian nga istorya nga ginahaboy batuk sa iya bangud wala ini nagkulang sa pagpahanumdum nga magbayad sa bangko nga igabuhin sa ila monthly honorarium.
Nagpromisa man suno diri si Duron nga siya ang magabayad sa bangko kag sa pagkamatuod ginahulat na lamang sang nasambit nga punong barangay ang promissory note sini.
Apang, ginpasuguro man ni Doloso nga sa tion magpakatig-a pa ang amu nga barangay treasurer, siya na mismo personal ang magahimo sang aksyon agud gilayon nga masolusyunan ang makabig dako nga isyu sa ila barangay.
