Positibo si Pangulong Ferdinand Marcos Jr. nga maangkon sa gihapon ang mga target nga programa sa masunod nga tuig apisar mas manubo gikan sa hagna ang gin-aprubahan nga 2025 national budget.
Sa line veto message sang Presidente ginpahayag sini nga ginalauman nga magatuga sang “multiplier effect” sa ekonomiya sang pungsod ang gin-aprubahan nga budget.
Mangin si Finance Secretary Ralph Recto ang nagpahayag man nga mangin mapag-on ang dalagan sang ekonomiya sa masunod nga tuig.
Ginhatagan-pagtamod ni Recto nga first time sa history sang pungsod nga pareho ang education sector kag ang capital outlay sector sang DPWH, DOTr (Department of Transportation) nga nag-angkon sang trillion pesos nga budget gani daku ang amot sini sa pag-angkon sang ekonomiya sa 2025.
Ginalauman man sang Pangulo ang pagkaayo sang proseso sa pagnegosyo kag paghimo sang mas madamo nga bag-o nga trabaho.
Pagasuportahan sang budget ang modernisasyon sang agrikultura kag agribusiness, pagsakdag sang negosyo kag investments, pagpasangkad sang mga serbisyo, kag mas advance nga research and development.
Magapabilin naman suno diri sa 5 tubtob 6% sang gross domestic product (GDP) sang pungsod ang paggastos sa imprastraktura para mapabilin man ang mataas nga trajectory sang pag-umwad.
Ginpasiguro naman sang Pangulo ang maid-id nga pagdumala sa mga utang para magsaka pa ang rating sang pungsod sa nagkalain-lain nga global credit rating agencies kag maka-utang pa sa mas manubo nga interes agud masuportahan ang dalagkuan nga proyekto sang gobyerno.
Ginganyat sang Pangulo ang mga Pilipino nga suportahan kag makig-isa sa gobyerno agud maga-uswag pa ang pungsod Pilipinas.
