ROXAS CITY – Nagapangabay ang mga katapo sang Philippine Coast Guard (PCG) – Capiz sa mga mangingisda nga may magagmay sang sakayang-pandagat.
Sa interview sang Bombo Radyo kay Chief Petty Officer Roque Borja, III, Deputy for Operations, suno diri nga kinahanglan i-monitor sang mga mangingisda ang kadagatan antes magpalawod.
Likawan man suno diri sang mga may magagmay nga sakayan nga magpangisda sa tion nga dalagkuan ang balud kag mabaskog ang hangin.
Ini nga pahayag ang may kaangtanan sa magkatuhay nga insidente sang pagkulob sang duha ka mga magagmay nga sakayan sa kalalawran sang syudad.
Ginakasubo sini ang pagtaliwan sang isa ka amay nga nagapangisda lang kuntani para mga nagahulat sini nga kabataan.
Nahibaluan nga balo na ang amu nga biktima kag may apat ka mga menor de edad nga kabataan, kun sa diin nagligad nga tuig lang nagtaliwan man ang iya asawa.
Bangud sini, nagapaalinton ang PCG-Capiz nga amligan ang kabuhi kag indi na magpalawod kun malain ang panahon.
Matandaan nga wala sang ginpaguwa nga advisory ang coast guard bangud hanging amihan gid lamang ang gintunaan sang malain nga panahon kag wala sang bagyo ukon Low Pressure Area sa probinsya.
