ROXAS CITY, CAPIZ- Nagpatigayon sang dungan nga surprise drug test ang Philippine Drug Enforcement Agency (PDEA) Region 6 kag Land Transportation Office (LTO) Region 6 sa mga terminal sang pampasahero nga salakyan sa bilog nga Western Visayas bilang kabahin sang “Oplan Harabas” sang PDEA kag “Oplan Byaheng Ayos” sang LTO.
Sa interview sang Bombo Radyo kay Ma. Graziella Tanaleon, Information Officer sang PDEA Region 6, iya ginpahayag nga anom ka mga driver ang nagpositibo sa ginpatigayon nga initial drug test kag ginapadalom subong sa confirmatory test agud mapabaskog ang resulta.
Suno kay Tanaleon, ang operasyon ang dululungan nga ginpatigayon sa mga nagapanguna nga terminal sa Roxas City, Capiz; Jaro, Iloilo City; Caticlan, Aklan; kag San Jose, Antique.
Base sa inisyal nga report, lima (5) sa mga nagpositibo ang halin sa Antique, samtang isa (1) naman ang halin sa Aklan.
Samtang, liwat nga ginpahanumdom sang LTO-6 sa mga motorista nga sundon ang mga safety tips nga kilala bilang “BLOWBAGETS” (Battery, Lights, Oil, Water, Brakes, Air, Gas, Engine, Tire, Self) antes nga magbyahe, agud masigurado ang safety sa pagpanlakaton subong nga tigkalalag.
Interviewed by Bombo Francis Biñas
