CAPIZ- Naka-record sang pagbaha sang Capiz Provincial Disaster Risk Reduction and Management Unit ( PDRRMU) sang pagbaha sa pila ka mga lugar sa probinsya sang Capiz.
Sa interview sang Bombo Radyo kay Atty. Shiela Artillero, Head sang Capiz Provincial Disaster Risk Reduction and Management Unit ( PDRRMU) , iya ginpahayag nga sandig sa Philippine Atmospheric Geophysical Astronomical Services Administration (PAGASA), ginpaidalum ang probinsya sang Capiz sa thunderstorm advisory kun sa diin naka-eksperyensya sang mabunog nga pag-ulan nga nagresulta sa pagbaha kag pagkarusdak sang duta.
Suno kay Artillero, lakip sa mga lugar nga ginbaha amo ang Baranagay Lonoy kag Barangay Tiza sa syudad sang Roxas, Barangay Majanlud sa banwa sang Sapian, Barangay Parian sa banwa sang Sigma, Barangay Ondoy, Barangay Agmalobo, Barangay Malocloc Norte, Barangay Cabugao, Agustin kag Mianay sa banwa sang Ivisan.
Samtang, may nabalhag man nga landslide sa bahin sang Brgy. Malocloc Sur, kag Brgy. Cabugao sa banwa sang Ivisan.
Pahayag pa niya, may pila ka mga pumuluyo man ang nagpadulong sa mga evacuation center bangud sang gulpi nga pagtaas sang tubig.
Dugang pa sang natungdan, padayon ang ila nga pagmonitor kag pag-assess sang sa sitwasyon agud nga masiguro ang seguridad sang mga pumuluyo.
INTERVIEWED BY: BOMBO ROADNIE DABAN DALANON
