Nagpaandam si US Secretary of Defense Pete Hegseth ang Asia-Pacific region kag ang bug-os nga kalibutan angot sa preparasyon sang China nga gamiton ang ila pwersa militar agud bag-uhon ang balance of power sa Indo-Pacific.
Ginhimo sang hepe sang Pentagon ang paandam sa iya speech sa Shangri-La Dialogue, ang tuigan nga security forum, nga ginhiwat sa Singapore.
Ginpahayag man ni Hegseth nga ang mga pwersa sang People’s Liberation Army (PLA) ang nagahanas adlaw-adlaw agud maghimo sang aksyon militar batok sa Taiwan.
Sa pihak sini, nagpasalig si US President Donald Trump nga indi niya pagtugutan nga mapukan ang Taiwan sa China sa idalum sang iya pagpamuno.
Ginhingyo man sang opisyal sang US ang mga kaalyado kag kaupod sang Amerika sa rehiyon nga maghugpong batok sa China, lakip na sa isyu sang Taiwan kag iban pa nga mga pagbinaisay sa rehiyon kun sa diin agresibo nga ginasulong sang China ang iya agenda, kaangay sang ginabaisan nga South China Sea.
Gin-engganyo man ni Hegseth ang mga pungsod sa Asya nga dugangan ang ila paggasto sa depensa, pareho sang iya mga kaalyado sa North Atlantic Treaty Organization (NATO) nga nagdugang sang pondo sa depensa sa 5% sang gross domestic product (GDP).
Samtang, gin-athag naman sang hepe sang Pentagon nga indi luyag sang America nga may conflict sa China, apang ginpanindugan sini nga indi pagtugutan sang administrasyon ni Trump nga magpangibabaw ang agresyon sang China.
