Natapos ang maritime drills sa tunga sang Pilipinas kag Australia nga wala sang interference ukon ano pa man nga problema samtang nagalayag sila sa West Philippine Sea (WPS).
Suno kay Armed Forces of the Philippines (AFP) Education, Training and Doctrine Commander Maj. Gen. Francisco Lorenzo Jr., wala sila sang nasugata nga pamahog sa tunga sang ginhiwat nga Exercise Amphibious Land Operation (ALON), nga ginakabig bilang pinakadako nga bilateral exercise halin sang nagsugod ini sa tuig 2023.
Antes sini, ang Philippine kag Australian naval forces upod ang Canada, nagpatigayon man sang multilateral exercise malapit sa Panatag Shoal, nga naglakip sang coordinated air defense drills kag precision formation sailing, bilang kabahin sang mas lapad nga Exercise Alon 2025.
Ginpakalain sang defense ministry sang China ang nasambit nga aktibidad kag gin-akusahan ang Pilipinas nga nagapangita sang impluwensya sa guwa kag gina-alegar aksyon sang seguridad kag katawhayan sa rehiyon.
Apang ginpabutyag ni Maj. Gen. Lorenzo nga ang biennial drills wala ginahimo bilang pamahog sa isa ka partikular nga pungsod kundi isa ini ka preparasyon agud mapabaskog ang depensa kag interoperability sang naval forces sang Pilipinas kag Australia. Sa closing ceremony, ginpasalig man sang AFP nga padayon nga palig-onon ang kooperasyon sa mga kaalyado para sa siguridad sang teritoryo.
